覕喙論鬼神

神交神仙交仙

妖魔敆鬼怪七月現身

人間說分明：

假仙捽頭毛，捋喙鬚

假鬼、假怪硞硞傱

假童、假乩亂亂刜

假神明錯手烏白摸

佇七月的舞台

鬼頭鬼腦鬼喙，答鬼鼓

一時內神通外鬼

個個戴痟鬼仔殼

啉燒酒的組一黨，通乾啦

跋麻雀的大聲喝，我到矣

鬼門開完開天門

地府遊煞遊天庭

七月佇人間

枵鬼無細膩

錢鬼拚現金

酒鬼毛鬖鬖

散鬼跔壁邊

雙面刀鬼，坐大位

攏總捅

閣有一寡暗暗毿毿的

毋成神毋成鬼毋成人毋成猴

面色烏崁崁誠威嚴

頭殼衝煙，喙瀾㴙㴙津

有人信甲會食糕仔

等有一工予鬼姦著才知影

豬哥神敆著不死鬼

唸咒畫符閣會颺颺飛，誠夭壽

七月，騙鬼統奢颺

行東西幌南北，地球頭尾四界踅

怹講糊瘰瘰的七月，鬼神掠交替

月底鬼門關了，神明就會窒倒街

散鬼變財神

枵鬼變食神

酒鬼變詩神

Mooh壁鬼變胡神

七月，過久足矣

無疑悟到今(tann)

假鬼猶無法度回地府

假童也毋願退駕

假神煞降旨，欲娶細姨！

奉勸諸位大德：

七月的耳空鬼仔絕對愛掠予定，毋通

人講無欲聽，鬼拖溜溜行

小丑之歌︰這是啥物款的世界？

這是啥物款的世界？

大家開喙看天聽雷公大細聲

新聞直直落，逐滴攏是地獄來的夜婆

咱吞落喉是目屎，入腹內

悲哀煞親像死狗放水流

阮半瞑醒起來活靈靈大聲吼

細聲講，這是啥物款的世界

人濟錢濟自由濟銃子濟

痟的（siáu—ê）閣較濟

這是啥物款的世界？

天烏一爿，月娘行出來看，

怹當咧講權利，額頭攑甲懸懸懸

阮探頭問伊，這是啥物款的國家？

自由的神明徛佇遐

欲講倫理欲講傳統欲講上帝？

恬恬，這馬當咧選舉

這是啥物款的世界？

日頭倒頭栽，光pang pang的暗瞑

真濟gâu人真濟故事一直講一直講

怹攏袂記得佇後台等真久真久的

這個小丑仔。可惡，這是啥物款的時代？

現代後現代猶未輪到阮的時代

這是啥物款的世界，害阮

歸瞑頭殻亂亂想，想，一直想

想甲七月火燒埔，想甲

歸粒地球攏欲爆炸啦

好啦，來聽歌，新聞崁起來

這是一條小丑的歌，怪怪的，伊講

阮有上嫷的喙䫌，也有烏白漆的面

恁有光明的日子，也有烏暗的城市

伊講，這是什麽款的世界

咱是啥物款的人

咱一定愛改變，改變，一直變

向前行，啥物攏毋驚

這个世界，這款運動

化身十二生相的

這款雲尪

佇赤焱焱的日頭邊

傱來傱去

怹的汗水流落塗跤

臭酸氣，對人的身軀涗(suè)出來

一陣一陣攏有合過八字

排無入生相的

這款貓咪

伊本底統gâu跳高比賽

毋過這馬上懸跳甲膨椅

聽著運動，目睭就沙微

規喙角全是愛的

這款政客

選舉的鑼鼓若霆(tân)

就開始運動

伊的頭殻佇雲頂颺颺飛

觀星望斗，算看佗一篷的天年

伊的跤腿佇塗底硞硞傱

Tshāi柱仔牽親引戚

干焦睶一雙手，留踮人間

握手假笑，抱拳拜託，頓胸坎保證

攑手贊成有利頭的議題

有時陣嘛會退化甲12歲的

這款公民

選舉進前流行造神比賽

選舉了後換做掔(khian)雞卵運動

毋過怹造的神已經發翅矣

雞卵仙掔掔袂著

無掔出去的，孵出一陣怨嘆

kè-kè叫

無屬上帝界管的

這款神明

規工坐定定無愛振動

毋過童乩若發起來

煞會想欲招媠姑娘

去眠床頂運動

佇人代筆的藥籤內底

這是治病的秘方

愈來愈毋是款的

21世紀

逐項運動攏誠害，不如

閒閒上夢，手婆騎鳥鼠走相逐

無定著有一工

嘛會出國提金牌

論龜鱉

按怎講

一塊tīng硞硞，喝袂振動

聽著摃鎚仔，龜跤隨著趖出來

起跤就lōng

(這時陣，想欲掠龜就走鱉)

按怎講

有時叫是龜，有時看做鱉

畫形圖，寫英語。跋明牌，逼籤詩

有時摃著龜，有時撼著鱉

(做代誌莫龜龜毛毛，做人毋好龜龜鱉鱉)

按怎講

歹年冬，撈（hôo）無魚蝦，換掠龜佮鱉

時代的轉型正義

齊齊橐(lok)落甕仔內，予怹相創治

(煞佇遐走相逐，龜笑鱉無尾，鱉笑龜無喙齒)

按怎講

欲來料理一隻鱉，頭伸出去，剁掉

跤手伸出去，斬掉

攏提來燖（tīm）當歸，喙開開，用跤相飼

(龜跤龜內肉，仙飼飼著家己)

莫閣講啦

你用的成語，粗俗兼袂牽詩

想欲求神嘛無著時

規氣䖙踮壁邊戇戇看電視

(莫閣想好好鱉刣甲屎流的代誌)

按怎，袂記得這馬民國幾年

電腦戀歌

網路的宇宙無限大

每一个天庭攏有一場戲

每一个仙人攏有一支上帝的指頭仔

點落去，創世紀

一个亞當，一个夏娃開始

無限的人面攏活起來，靈靈

佇阮的世界內底

狗齧（khè）冊，愈齧愈慼

人面冊，愈翻愈濟

佇遮，人人是上帝

一肢指頭仔，點出風雷雨雪

越一个頭，化身幾若萬个

有足濟名字，足濟面腔的你

定定坐佇千萬里外

偷偷仔用目尾捽，等待阮哀一聲

讚！

敢知影，阮的畫眉一直飛一直飛

阮的目箭一直鑽一直鑽

想欲去佮你相會

毋管三十三層天，七十七重地

阮佇三月的落雨瞑

一粒插電的腦，一片無限闊的空

一張無所不至的相思網

規个世界，攏是咱的

上帝的籤詩

創世紀，上帝用煙火寫詩

光爍爍的文字，抾做日月佮天星

留落來的煙黗，浞做一粒塗丸仔

晟飼罪人佮精牲

(有時陣，閣用雷公爍爁來點醒)